FA’ASILASILAGA TAUA – AITALAFU I FANUA O LE MALO

E muamua ona fa’atulou atu i le tapuai fa’afofoga a Samoa aemaise o lenei vaitau faigata o le Koviti-19.  Ae ile ava ma le fa’aaloalo tele matou te fa’asilasila atu ai mo le silafia e le mamalu o le tatou atunu’u Tulāfono ma Aiaiga uma ole fa’aaogāina o FANUA ole Malo. E patino tonu lenei fa’asilasilaga taua i FANUA LISI pei ona lisiina atu mo Fa’atoaga, Pisinisi, Fa’alapotopotoga ma Fanua Nofo, e fa’apea:

  1.  E matuā tāpu lava ma e lē fa’atagaina ona teuina se tino maliu ose tagata i luga o nei fanua ole Malo;
  2.  E matuā fa’amalosia foi le aveeseina (liutofaga) o ni tu’ugamau ua faia fa’amalosi i luga o nei fanua ole Malo;
  3.  E matuā fa’asāina lava ona suia le fa’amoemoe ole lisi na fa’amatu’uina atu ai le fanua e aunoa ma se maliega ale Fa’alapotopotoga o Eleele o Samoa;
  4.  E matuā fa’amalosia lava le galueaina male fa’aaogā tatauina o nei fanua e tusa ai ma aiaiga o le lisi;
  5.  E matuā fa’amalosia le totogi lelei o tau o nei lisi e tusa ma aiaiga o Feagaiga;
  6.  O fanua uma na lisiina atu mo faatoaga ae o loo maitauina e le’o fa’aaogaina o le a toe fa’afoi mai mo le fa’asoa i le mamalu o le atunu’u o lo’o ile lisi fa’atalitali.

E taua ona silafia e le mamalu o le atunu’u, o le solitulafono lou lē usita’ia o aiaiga o nei Feagaiga ua faia e tusa ma Tulāfono ole Malo o Samoa.  Afai ole ā le tausisia nei aiaiga uma ona fa’amutaina lea o lau lisi ma tu’uina atu lenei mataupu ile Tulāfono.  E taua tele lo tatou galulue fa’atasi mo le manuia lautele o Samoa.

Ma le fa’aaloalo lava

OFISA SILI O LE PULEGA

FA’ALAPOTOPOTOGA O ELEELE O SAMOA