FA’ASILASILAGA TAUA – AITALAFU I FANUA O LE MALO

E faasilasila atu ma le faaaloalo  lava e tatau ai ina ia logomau i le silafia a le mamalu o le tatou atunu’u le tulaga o ‘AITALAFU’ a i latou o lo’o fa’aaogaina fanua o le Malo. Ua matuā tatau nei ona outou afifio mai e totogi uma a outou aitalafu o lo’o fa’amauina i fanua o lo’o resitaIaina i o outou suafa  i totonu o le masina lenei o  Aperila 2019 i le Faalapotopotoga o Eleele o Samoa poo le Samoa Land Corporation.

E le o mavae le taulogologo a le Fa’alapotopotoga ma tu’uavanoa ia outou aitalafu peitai o le toatele e le o fa’atauaina lea galuega. O le agaga o le Fa’alapotopotoga ina ia tausisia le amiotonu ma le fa’amaoni o Feagaiga na tatou osia mo le ofoina atu o nei fanua.

E le avea foi lou le maua o se tusi faamanatu mai le Faalapotopotoga e fai ma alofaga o le lē totogia o lau aitalafu, aua foi o loo maioio lelei i feagaiga na sainia o lau matafaioi lava lea o le totogi o le faaaogaina o fanua o le Malo.

Afai o le a le usitaia lenei talosaga ona fa’atinoina lea e le Fa’alapotopotoga o auala nei ina ia vave aoina mai ai a outou aitalafu:

  1. O le a fa’asalalauina o outou suafa ma o outou afioaga ma le aofaiga o a outou aitalafu i luga  o  ala  faasalalau  uma o lo’o avanoa  i  le Fa’alapotopotoga  e  pei o auaunaga a Fale Televise, Leitio, o Nusipepa fa’apea foi Upega Tafailagi;
  2. O le a fa’amutaina loa lou avanoa i le fanua ma toe fa’afoi mai e le Fa’alapotopotoga lea fanua mo le toe fa’asoaina atu i le mamalu o le atunuu o lo’o talosaga mai pea; ma
  3. O le a tu’uina atu loa a outou aitalafu i le Faamasinoga mo le toe totogiina mai. E avanoa pea lo tatou Ofisa i Tuanaimato mo le fa’amalamalamaina o aiaiga o ā outou aitalafu.

Faia ma le fa’aaloalo tele,

FAALAPOTOPOTOGA O ELEELE O SAMOA